ਰੱਬ ਯਾਰ ਜਾਂ ਯਾਰ ਰੱਬ
ਹੈ ਯਾਰਾਂ ਜਿਹਾ ਨਾ ਯਾਰੜਾ
ਕੋਈ ਠਹੁਰ ਨਾ ਕੋਈ ਟਿਕਾਣਾ
ਮੈਂ ਭਾਲਾਂ ਕਿੱਥੋਂ ਯਾਰੜਾ
ਸੁੱਕੇ ਅੰਬਰ ਧਰਤੀ ਪਾਟੀ
ਬਰਸੇ ਤਾਂ ਬੱਦਲ ਯਾਰੜਾ
ਜਾਂਦਾ ਬਣ ਅੱਖਾਂ ਦਾ ਨੀਰ
ਕਦੇ ਦਿਲ ਦੀ ਅੱਗ ਹੈ ਯਾਰੜਾ
ਸਾਵੀ ਧਰਤੀ ਅੰਬਰ ਨੀਲੇ
ਖਿੜ ਖਿੜ ਹੱਸੇ ਯਾਰੜਾ
ਰੰਗ ਗਿਆ ਮੇਰੀ ਕੋਰੀ ਚਾਦਰ
ਉਹ ਵੱਡਾ ਲਲਾਰੀ ਯਾਰੜਾ
ਤੱਕਣੀ ਵੱਟੇ ਦਿਲ ਲੈ ਜਾਂਦਾ
ਉਹ ਵੱਡਾ ਵਪਾਰੀ ਯਾਰੜਾ
ਉਸਦੀ ਵਿਸਾਦ ਨਾ ਪਲਟੇ ਕੋਈ
ਉਹ ਵੱਡਾ ਖਿਡਾਰੀ ਯਾਰੜਾ
ਮੋਹ ਜਾਲ ਵਿੱਚ ਮੈਨੂੰ ਮੋਹਿਆ
ਉਹ ਵੱਡਾ ਸਿਕਾਰੀ ਯਾਰੜਾ
ਫੜ ਫੜ ਡੋਰੀ ਨਾਚ ਨਚਾਵੇ
ਉਹ ਵੱਡਾ ਮਦਾਰੀ ਯਾਰੜਾ
ਪਲ ਪਲ ਤੇ ਮੈਨੂੰ ਭਰਮਾਉਂਦਾ
ਸੌ ਰੰਗ ਵਟਾਉਂਦਾ ਯਾਰੜਾ
ਮਿੱਟੀਓਂ ਉਪਜਾ ਕੇ ਫੁੱਲ ਕਰਦਾ
ਫਿਰ ਖਾਕ ਬਣਾਉਂਦਾ ਯਾਰੜਾ
ਜਦ ਸੋਚਾਂ ਉਹ ਦੂਰ ਏ ਮੈਥੋਂ
ਭੱਜ ਨੇੜੇ ਆਉਂਦਾ ਯਾਰੜਾ
ਪੰਡ ਬੜੀ ਕਰਮਾਂ ਦੀ ਭਾਰੀ
ਮਾਰ ਫੂਕ ਉਡਾਉਂਦਾ ਯਾਰੜਾ
'ਮਹਕ' ਮੇਰਾ ਤਨ ਮਨ ਧਨ ਓਹੀ
ਬੜੇ ਚੋਜ ਦਿਖਾਉਂਦਾ ਯਾਰੜਾ
Thursday, July 22, 2010
Subscribe to:
Posts (Atom)